• जीएसटीचे प्रधान आयुक्त दिनेश पांगारकर यांची माहिती

बेळगाव / प्रतिनिधी 

केंद्रीय जीएसटी अधिकाऱ्यांच्या पथकाने बनावट पावत्या तयार करून करचुकवेगिरी करणाऱ्या रॅकेटचा पर्दाफाश केला असून वस्तू आणि साहित्याची वाहतूक करण्याव्यतिरिक्त फेडरल लॉजिस्टिक कंपनीचे मालक नकीब नजीब मुल्ला यांच्यावर तक्रार दाखल करण्यात आली आहे. बनावट पावत्या तयार करून कर चुकवलेल्या आणि व्यवसायाने कर सल्लागार असलेल्या नकीब नजीब मुल्ला (वय २५, रा. आझमनगर, बेळगाव) यांनी जीएसटीमध्ये १३२ कोटी रुपयांची फसवणूक केल्याचे उघड झाले आहे. फसवणूक करणाऱ्या कर सल्लागार नकीब मुल्ला याला केंद्रीय जीएसटी पथकाने अटक करून बेळगावच्या द्वितीय जेएमएफसी न्यायालयासमोर हजर केले असता न्यायालयाने १४ दिवसांची न्यायालयीन कोठडी सुनावली असल्याची माहिती जीएसटीचे प्रधान आयुक्त दिनेश पांगरकर यांनी दिली.

यावेळी ते पुढे म्हणाले, नकिब मुल्ला गेल्या काही वर्षांपासून बेळगावात जीएसटी कन्सल्टंट म्हणून काम करत आहे. त्याची स्वतःची नेसस फेडरल लॉजिस्टिक कंपनीदेखील आहे. तो बेळगावसह गोवा आणि महाराष्ट्रातील मोठ्या व्यावसायिकांचा सीजीएसटी कन्सल्टंट म्हणून काम पाहत होता. उत्पादनाच्या मोबदल्यात सीजीएसटी विभागाला भरावा लागणारी कर स्वरूपातील रक्कम तो व्यावसायिकांकडून घेऊन कर परतावा देत होता. त्यामुळे अनेक मोठमोठे व्यापारी आणि उद्योजक त्याला काम देत होते. मात्र, जानेवारी २०२४ पासून त्याने करदात्यांना टोपी घातल्याचे पुढे आले आहे. करदात्यांकडून रक्कम घेतल्यानंतर त्याने ती सीजीएसटी विभागाला भरलीच नाही. मात्र, जीएसटी भरल्या भासवण्यासाठी करदात्यांना तो बनावट कर पावत्या देत होता. यापैकी एका व्यापाऱ्याला कर न भरल्याबद्दल विभागाकडून नोटीस आल्यानंतर हा प्रकार उघडकीस आला. त्यामुळे त्याने याबाबत क्लब रोडवरील विभागाच्या कार्यालयात मुल्लाविरोधात तक्रार दाखल केली. ही बाब गांभीर्याने घेत सीजीएसटीच्या दक्षता विभागाने मुल्लावर गुन्हा दाखल करून अटक केली.