• शहर आणि तालुका समितीच्या संयुक्त बैठकीत म. ए. समितीच्या नेत्यांचा सल्ला  
  • लोकसभा निवडणुकीच्या पार्श्वभूमीवर मराठा मंदिर येथे बैठक 

बेळगाव / प्रतिनिधी  

बेळगाव लोकसभा मतदारसंघातील महाराष्ट्र एकीकरण समितीचे अधिकृत उमेदवार महादेव पाटील यांचा अर्ज भरण्यापासून ते निवडणूक प्रक्रिया पार पडेपर्यंत प्रत्येकाने सहकार्याची भूमिका घेऊन निवडणूक पार पाडावी, असा सल्ला  महाराष्ट्र एकीकरण समितीच्या नेत्यांनी आज मराठा मंदिर येथे झालेल्या बैठकीत दिला.

आगामी लोकसभा निवडणुकीच्या पार्श्वभूमीवर शहर आणि तालुका महाराष्ट्र एकीकरण समितीच्या झालेल्या  संयुक्त बैठकीत महादेव पाटील यांच्या प्रचाराची पुढील रणनीती आखण्यात आली.

यावेळी बोलताना मदन बामणे यांनी नियम उमेदवारी अर्ज भरण्यापासून ते उमेदवारी अर्ज सादर करेपर्यंत समितीतील ज्येष्ठ आणि तज्ञ वकिलांचा सल्ला घ्यावा, आचारसंहितेतील तरतुदींचा बारकाईने अभ्यास करावा, राष्ट्रीय पक्षांना कुठेही चुका मिळू नयेत अशा पद्धतीने खबरदारी घेऊन काम करावे. योग्य नियोजन करून प्रत्येकाने जबाबदारी वाटून घ्यावी  अशा सूचना दिल्या.

याप्रसंगी ज्येष्ठ साहित्यिक गुणवंत पाटील यांनी राष्ट्रीय पक्षांचे मराठी विरोधी धोरण मोडीत काढावे आणि मराठी भाषिकांनी संयुक्तिकरित्या काम करावे असे आवाहन केले.

यावेळी अनेक समिती कार्यकर्त्यांनी  सल्ला आणि सूचना दिल्या. या बैठकीला  समितीचे उमेदवार महादेव पाटील, ॲड. राजाभाऊ पाटील, माजी आमदार मनोहर किणेकर, समिती नेते प्रकाश मरगाळे, ॲड. अमर येळळूरकर, अंकुश केसरकर गुणवंत पाटील, सागर पाटील आदींसह अनेक कार्यकर्ते उपस्थित होते.

  • महादेव पाटील यांच्या प्रचाराचा उद्या शुभारंभ :

बेळगाव लोकसभा मतदारसंघाचे महाराष्ट्र एकीकरण समितीचे अधिकृत उमेदवार महादेव पाटील यांच्या प्रचाराचा उद्या शुक्रवार दि. १२ एप्रिल रोजी शुभारंभ करण्यात येणार आहे. सकाळी ९.३० वा. बेळगाव तालुक्याची आराध्य दैवता उचगावची ग्रामदेवता श्री मळेकरणी देवी मंदिरात पूजन करून प्रचाराला प्रारंभ होणार आहे.

बेळगाव शहर आणि तालुक्यातील महाराष्ट्र एकीकरण समितीच्या कार्यकर्त्यांनी शेकडोच्या संख्येने उपस्थित राहावे, असे आवाहन शहर महाराष्ट्र एकीकरण समितीचे कार्याध्यक्ष रणजीत चव्हाण पाटील आणि तालुका महाराष्ट्र एकीकरण समितीचे कार्याध्यक्ष माजी आमदार मनोहर किणेकर, म. ए. समितीचे नेते रमाकांत कोंडुसकर, आर. एम. चौगुले, ॲड. अमर येळळूरकर यांनी केले आहे.