• हनुमान नगर बेळगाव येथील घटना 

खानापूर / प्रतिनिधी

दैनंदिन रोजंदारीसाठी प्लंबिंग कामाला गेलेल्या युवकाचा विजेच्या धक्क्याने जागीच मृत्यू झाला. बेळगाव हनुमाननगर येथे  सोमवारी दुपारी ३ वा. च्या सुमारास ही घटना घडली. महेश परशराम पाटील (वय २१ रा.वड्डेबैल ता.खानापूर) असे मृत युवकाचे नाव आहे. 

याबाबत मिळालेली माहिती की, बेळगाव येथील हनुमाननगर येथे मुख्य कंत्राटदार अभिजीत फकीरय्या  शिवयोगीमठ यांच्या अंतर्गत सब ठेकेदार म्हणून लक्ष्मण मंजळकर (रा.अनगोळ) यांच्यामार्फत मृत महेश परशराम पाटील हे प्लंबिंग काम करण्यासाठी बेळगाव हनुमान नगर येथे दररोज कामाला जात होते. दुपारी काम करत असताना हातामध्ये असलेल्या ग्राइंडर मशीन मधील विद्युतभारित तार तुटल्याने त्याला स्पर्श झाला, त्यामुळे तो जागीच ठार झाल्याची माहिती प्राप्त झाली आहे. याप्रकरणी सदर कंत्राटदार लक्ष्मण मंजळकर याच्या विरोधात बेळगाव एपीएमसी पोलीस स्थानकात दाखल करण्यात आला आहे. त्याच्या पश्चात आई-वडील,आजोबा,दोन बहिणी असा परिवार आहे. त्याच्या आकस्मिक मृत्यूमुळे चापगाव पंचक्रोशीत हळहळ व्यक्त होत आहे.

याप्रकरणी बेळगाव एपीएमसी पोलिस स्थानकात संबंधित कंत्राटदारा विरोधात एफआयआर दाखल करण्यात आला असून युवकाचा मृतदेह शवविच्छेदनासाठी बेळगाव सिव्हिल हॉस्पिटलच्या  शवागारात ठेवण्यात आला आहे. त्याच्यावर मंगळवारी सकाळी दहाच्या सुमारास वड्डेबैल येथे अंत्यसंस्कार करण्यात येणार आहे.