बेळगाव /  प्रतिनिधी 

साक्षर व्यक्ती आयुष्यात कोणत्याही परीक्षेला यशस्वीपणे सामोरे जाईल असे उद्गार राज्याच्या महिला आणि बालकल्याणमंत्री लक्ष्मी हेब्बाळकर यांनी काढले. आज शनिवार दि. १६ सप्टेंबर रोजी बेळगाव जिल्हा पंचायत, शालेय शिक्षण विभाग आणि क्षेत्रीय शिक्षण अधिकारी कार्यालय तालुका झोन बेळगाव यांच्या संयुक्त विद्यमाने गांधी भवन, बेळगाव येथे ६२ वा शिक्षक दिन सोहळा व तालुकास्तरीय प्रतिभा कारंजी कलोत्सवाचे उद्घाटन कार्यक्रमात त्या बोलत होत्या. 

यानंतर मंत्री हेब्बाळकर पुढे म्हणाल्या, जे शिक्षक सर्व मुलांना समान वागणूक देतात, मुलांना संस्कृती शिकवतात. त्यांना पालकांपेक्षा मुलांच्या भविष्याची जास्त काळजी असते. अशा शिक्षकांना तणावमुक्त ठवण्यासाठी आमचे सरकार आवश्यक ती सर्व पावले उचलणार त्यांनी सांगितले. बेळगाव येथील शिक्षकसंकुलाच्या बांधकामासाठी जागा देण्याचे आश्वासन देणाऱ्या लक्ष्मी हेब्बाळकर यांनी या देशाच्या उभारणीत शिक्षकांची भूमिका अत्यंत महत्त्वाची असल्याचे सांगत कौतुक केले. 

शिक्षकांना ब्रह्मा, विष्णू, महेश्वर म्हणतात. शिक्षकांना परमेश्वराचे स्थान दिले आहे. संपूर्ण देशाचे भवितव्य शिक्षकांवर अवलंबून आहे. शिक्षक हे समाजाचे आणि देशाचे भविष्य घडवणारे असतात. शेतकरी, सैनिक आणि शिक्षक हे आदर्श समाजाचे आधारस्तंभ असल्याचे त्या म्हणाल्या. शिक्षकांच्या विशेषत: ग्रामीण भागातील शिक्षक व महिला शिक्षकांच्या समस्या मला माहीत आहेत. तेव्हा शिक्षकांच्या समस्या सोडवण्यासाठी निश्चितच प्रयत्न करणार असल्याची ग्वाही त्यांनी दिली.

या कार्यक्रमाला तारिहाळ येथील श्री.आडवी सिद्धेश्वर स्वामी, शालेय शिक्षण विभागाचे उपसंचालक बसवराज नालतवाड, माध्यमिक शिक्षक संघाचे राज्य सरचिटणीस रामू गुगवाड, क्षेत्रीय शिक्षणाधिकारी डॉ. एस. पी. दशप्पनवार, हायस्कूल शिक्षक संघाचे अध्यक्ष कोरीशेट्टी, तालुका प्राथमिक शिक्षक संघाच्या अध्यक्षा पूजा पाटील, एम. बी. हुलामणी, बसवराज रायवगोळ, एम. एस. मेदरमठ व प्राथमिक व उच्च माध्यमिक शाळा शिक्षक संघाचे पदाधिकारी उपस्थित होते.