खानापूर / वार्ताहर 

खैरवाड (ता. खानापूर) येथे नव्याने स्थापन करण्यात येत असलेल्या  छत्रपती शिवाजी महाराजांच्या मूर्तीचे खानापूर येथे भव्य स्वागत करण्यात आले. रविवारी सकाळी कोल्हापूर येथून  सदर मूर्ती खानापूर येथे येताच ढोल ताशांच्या गजरात जांबोटी क्रॉस बसवेश्वर सर्कल पासून सवाद्य भव्य मिरवणूक काढण्यात आली.

या मिरवणुकीत युवा कार्यकर्ते महिला भगिनी मोठ्या संख्येने उपस्थित झाल्या होत्या. डोक्यावर कलश येऊन महिलांनी मोठ्या उत्साहाने या भव्य मिरवणुकीत सहभाग दर्शविला होता. शिवाय  छत्रपती शिवरायांची वेशभूषा केलेल्या युवकांमुळे मिरवणुकीची शान वाढली. मिरवणूक खानापूर येथील शिवस्मारक चौकात येताच खानापूर महाराष्ट्र एकीकरण समितीचे माजी अध्यक्ष तथा माजी आमदार दिगंबर पाटील यांच्याहस्ते शिवरायांच्या मूर्तीचे पूजन करण्यात आले. यावेळी आबासाहेब दळवी, प्रकाश चव्हाण, यशवंत बिर्जे, रूकमाना झुंजवाडकर यांच्यासह मान्यवर उपस्थित होते. माजी आमदार डॉ. अंजलीताई निंबाळकर यांनीही मिरवणुकीमध्ये सहभाग घेऊन शिवरायांना अभिवादन केले. यावेळी काँग्रेसचे अनेक कार्यकर्ते उपस्थित होते.

खानापूर शहरातून रूमेवाडी क्रॉस पर्यंत सदर मूर्तीचे उत्साहाने स्वागत झाले. त्यानंतर खानापूर ते नंदगड मार्गावर येणाऱ्या  अनेक गावातील शिवप्रेमींनी मूर्तीचे पुष्पहार घालून व महिला भगिनींनी आरती ओवाळून स्वागत केले. सायंकाळी ५ वाजता नंदगड बाजारपेठ येथून छत्रपती शिवरायांच्या मूर्तीची भव्य मिरवणूक झाली. बाजारपेठेतून संगोळी  रायण्णा  स्मारकापर्यंत जल्लोषी मिरवणूक काढण्यात आली. खैरवाड गावापर्यंत या मिरवणुकीत अनेक शिवप्रेमी व उत्साही युवकांनी मोठ्या संख्येने सहभाग दर्शवला होता.