बेळगाव / प्रतिनिधी 

बेळगाव दक्षिण विधानसभा मतदार संघाचे महाराष्ट्र एकीकरण समितीचे अधिकृत उमेदवार रमाकांत कोंडुसकर तसेच उत्तर विधानसभा मतदारसंघाचे अधिकृत ॲड. अमर येळळूरकर यांनी प्रचंड शक्ती प्रदर्शन करत आज उमेदवारी अर्ज दाखल केला.

प्रारंभी आंबेडकर उद्यानातील डॉ. बाबासाहेब आंबेडकरांच्या मूर्तीला अभिवादन करून या मिरवणुकीला सुरुवात झाली. मिरवणुकीत महाराष्ट्र एकीकरण समितीच्या कार्यकर्त्यांनी दिलेल्या बेळगाव,कारवार, निपाणी, बिदर भालकी सहसंयुक्त महाराष्ट्र झालाच पाहिजे, रहेंगे तो महाराष्ट्र मे नही तो जेल में, महाराष्ट्र एकीकरण समितीचा विजय असो या घोषणांनी परिसर दुमदुमून गेला होता. भगवे ध्वज, भगव्या टोप्या, फेटे आणि शाल घालून मिरवणुकीत सहभागी झालेल्या हजारो कार्यकर्ते आणि समर्थकांच्या गर्दीमुळे आज शहरात विजयी मिरवणुकीप्रमाणे वातावरण पाहायला मिळाले.

महानगरपालिकेत अर्ज दाखल केल्यानंतर भव्य मिरवणुकीला सुरुवात करण्यात आली. मिरवणुकीत ढोल-ताशे, पारंपारिक वाद्य, बैलगाड्या, घोडेस्वार, शिवरायांच्या वेशभूषेतील मराठमोळे मावळे तसेच महिला व युवा वर्गाचा लक्षणीय सहभाग होता. 

बैलगाडीत बेळगाव दक्षिणचे अधिकृत उमेदवार रमाकांतदादा कोंडुसकर तसेच बेळगाव उत्तरचे अधिकृत उमेदवार अमर येळळूरकर, महाराष्ट्र एकीकरण समितीचे ज्येष्ठ नेते माजी नगरसेवक रणजित चव्हाण पाटील उभे होते. यावेळी नगरसेवक रवी साळुंखे, नगरसेविका वैशाली भातखांडे, आनंद आपटेकर, महादेव पाटील, विकास कलघटगी, युवा समिती अध्यक्ष अंकुश केसरकर, शुभम शेळके, यांच्यासह आजी-माजी महापौर, नगरसेवक नगरसेविका महिला वर्गात तसेच युवक मोठ्या संख्येने उपस्थित होते.

विधानसभा निवडणुकीची घोषणा होण्यापूर्वी समिती आणि मराठी भाषिकांमध्ये एकीच्या नांदीला सुरुवात झाली असून समितीने केलेल्या आवाहनाला प्रतिसाद देत तमाम मराठी भाषिकांनी याची प्रचिती आणून दिली आहे. परिणामी बेळगावसह संपूर्ण सीमा भागात मराठी भाषिकांमध्ये एक नवचैतन्य पसरले आहे.