• निपाणी - चिक्कोडी मार्गावरील घटना 

निपाणी / वार्ताहर 

नातेवाहिकांच्या घरी जाताना कारची दुचाकीला धडक बसून झालेल्या अपघातात दाम्पत्याचा दुर्दैवी मृत्यू झाला. निप्पाणी - चिक्कोडी  मार्गावर कोथळी क्रॉसनजीक खडकलाट पोलीस ठाण्याच्या हद्दीत ही घटना घडली. 

बसवराज श्रीमंत नंदगावी (वय ४८) आणि दोडव्वा बसवराज नंदगावी (वय ४२) (रा. मल्लापूर पीजी  ता. गोकाक, जि. बेळगाव) असे मृत दाम्पत्याचे नाव आहे. याशिवाय कारमधील इतर चारजण जखमी झाले आहेत.   

याबाबत घटनास्थळावरून प्राप्त माहितीनुसार, बसवराज श्रीमंत नंदगावी पत्नीसह दुचाकीवरून कोथळी येथे नातेवाईकांच्या  घरी जात होते. त्यांची दुचाकी कोथळी क्रॉसजवळ आली. यावेळी चिक्कोडीमार्गे उस्मानाबादकडे  जाणाऱ्या कारचे चालक ज्ञानेश्वर देशमुख हे चिक्कोडीमार्गे उस्मानाबादकडे जात असताना कारचे नियंत्रण सुटले आणि समोरून येणाऱ्या दुचाकीला धडक दिली. यावेळी दुचाकीवर असलेले पती - पत्नी खाली पडले. बसवराज यांचा जागीच मृत्यू झाला, तर दोडव्वा, कार चालक ज्ञानेश्वर यांची पत्नी अमृता आणि मुलगा राजवीर जखमी झाले.जखमींना तातडीने चिक्कोडी शासकीय रुग्णालयात दाखल करण्यात आले. मात्र  दोडव्वा यांचा  रुग्णालयात उपचारादरम्यान मृत्यू झाला.उर्वरित चौघांवर प्रथमोपचार करून पुढील उपचारासाठी मिरज येथे दाखल करण्यात आले.घटनास्थळी पोलीस निरीक्षक  एस. सी. पाटील यांच्यासह उपनिरीक्षक सुमलता असंगी, सहायक उपनिरीक्षक एन. एस. पुजारी यांनी भेट दिली.