गुढीपाडवा २०२३ : हिंदू धर्मामध्ये गुढीपाडव्याच्या सणाला अनन्यसाधारण महत्त्व आहे. चैत्र महिन्याच्या शुक्ल पक्षाच्या प्रतिपदेपासून मराठी नववर्षाची सुरुवात होते आणि या दिवशी गुढीपाडव्याचा सण सर्वत्र मोठ्या थाटामाटात साजरा केला जातो. महाराष्ट्रात हा सण मोठ्या उत्साहाने साजरा केला जातो. गुढीपाडवा हा साडेतीन मुहूर्तांपैकी एक आहे. त्यामुळे हा दिवस अत्यंत शुभ मानला जातो. यावर्षी गुढीपाडवा आज २२ मार्च २०२३ रोजी सर्वत्र साजरा केला होतं आहे.

पौराणिक कथेनुसार, प्रभू श्रीराम या दिवशी रावणाचा पराभव करून अयोध्येत परतले. गुढीपाडव्याच्या दिवशी मराठी नववर्षाची सुरुवात होते. घरामध्ये गुढी उभारल्याने वाईट शक्ती दूर राहतात आणि घरात सुख-समृद्धी येते. असे  मानले जाते, म्हणून गुढीपाडव्याच्या दिवशी सर्वजण आपल्या घराची विशेष साफसफाई करतात आणि सजावट करून घरातले वातावरण प्रसन्न आणि शुद्ध बनवतात. गुढीपाडव्यापासून चैत्री नवरात्राची सुरुवात होते.

गुढीपाडव्याच्या दिवशी कडुनिंबाची पानं खाऊन दिवसाची सुरुवात केली जाते. यामुळे रक्त शुद्ध आणि शरीर मजबूत होते असे मानले जाते. 

गुढीपाडव्याला आंब्याच्या पानांचे तोरण घराच्या दारावर लावले जाते . त्यानंतर घराबाहेर सुंदर गुढी उभारली जाते. गुढीसमोर आणि दारासमोर आकर्षक रांगोळी काढली जाते. गुढीची मनोभावे पूजा करून सर्वांना गुढीपाडव्याच्या आणि नवीन वर्षाच्या शुभेच्छा दिल्या जातात.

गुढीपाडव्यानिमित्त घरात पुरणपोळी, बासुंदी, श्रीखंड, मसालेभात, आमरस, वेगवेगळ्या प्रकारच्या भाज्या, चटण्या, गुलाबजाम, कोथिंबीरवडी अशा वेगवेगळ्या पदार्थांची रेलचेल असते. या दिवशी घरातली सर्व मंडळी आवर्जून एकत्र जेवणाचा आस्वाद घेतात. या दिवशी घरात धनधान्य आणले  जाते. नवीन पिकाची पूजा केली जाते. तसेच सोने, वाहन किंवा घर यांची खरेदी केली जाते. गुढीपाडव्याच्या दिवशी कोणतेही काम सुरू करणे शुभ मानले जाते.