• बेळगावमध्ये महाराष्ट्र व गोव्यातून मोठ्या प्रमाणात मद्य तसेच रोकड येण्याची शक्यता  

बेळगाव / प्रतिनिधी   

विधानसभा निवडणुकीच्या पार्श्वभूमीवर निवडणूक आयोगाच्या आदेशानुसार जिल्हा प्रशासनाने  जोरदार तयारी केली आहे. जिल्ह्यामध्ये बेकायदा मद्य वाहतूक रोकड या विरोधात ठोस पावले उचलली आहेत. यासाठी इतर राज्यांच्या सीमांवर २४ चेक पोस्ट उभारण्यात आल्याची माहिती जिल्हाधिकारी व निवडणूक अधिकारी नितेश पाटील यांनी दिली. बेळगाव मध्ये महाराष्ट्र व गोव्यातून मोठ्या प्रमाणात मद्य तसेच रोकड येण्याची शक्यता आहे. त्यामुळे अधिक सतर्कता बाळगण्यात आली आहे.

महाराष्ट्र सीमेवर २० तर गोव्याच्या सीमेवर चार चेक पोस्ट भरण्यात आले आहेत. याचबरोबर अंतर्गत भागांमध्येही विविध ठिकाणी चेक पोस्ट उभे केले आहेत. त्या ठिकाणी पोलीस व इतर कर्मचाऱ्यांची नियुक्ती केली आहे. प्रत्येक वाहनाची तपासणी सुरू असून आत्तापर्यंत एक कोटीहून अधिक रुपयांची रोकड तसेच लाखो रुपयांचा मद्यसाठा जप्त करण्यात आला आहे. यापुढेही ही कारवाई केली जाणार आहे कोणत्याही परिस्थितीत आचारसंहिता भंग होऊ नये, याची काळजी घेतली जाणार आहे. निवडणूक आयोगाने जे आदेश दिले आहेत त्या आदेशांचे काटेकोर पालन करण्यात येणार असल्याचे जिल्हाधिकारी नितेश पाटील यांनी स्पष्ट केले आहे.