कोगनोळी / वार्ताहर 

कोगनोळी येथील राष्ट्रीय महामार्ग क्रमांक चारवर असणाऱ्या आप्पाचीवाडी फाट्यानजीक अपघातात चालक ठार झाल्याची घटना सोमवार दि. ६ फेब्रुवारी रोजी सायंकाळी उशिरा घडली. चालक - मालक सुरेंद्र चव्हाण (वय २८) रा.  पालघर असे मृताचे नाव आहे.

याबाबत घटनास्थळावरून प्राप्त माहितीनुसार, स्वतः मालक व चालक असणारे सुरेंद्र चव्हाण आयशर गाडी घेऊन बेंगळूरहून मुंबईकडे जात होते. येथील आप्पाचीवाडी फाट्यावरील उताराला गाडीवरील नियंत्रण सुटल्याने  समोरून जाणाऱ्या अज्ञात वाहनाला जोराची धडक बसली. या अपघातात चालक जागीच ठार झाला. आयशर ट्रक सुरू असलेल्या राष्ट्रीय महामार्गाच्या रुंदीकरणाच्या खड्ड्यात आदळला. घटनास्थळी निपाणी मंडळ पोलीस निरीक्षक एस. सी. पाटील, ग्रामीण पोलीस स्थानकाचे एएसआय एस.ए.टोलगी,  पी. डी. गस्ती यांनी भेट दिली. एम.एम. अवताडे  रोड डेव्हलपर्सच्या कर्मचाऱ्यांनी  अपघातग्रस्त वाहनातील  मृतदेह बाहेर काढून  उत्तरीय तपासणीसाठी निपाणी येथील महात्मा गांधी रुग्णालयात पाठवला. या घटनेची नोंद निपाणी ग्रामीण पोलीस स्थानकात झाली असून पोलीस अधिक तपास करत आहेत.