सौंदत्ती / वार्ताहर 

बेळगाव जिल्ह्यातील सौंदत्ती मतदारसंघाचे आमदार तथा विधानसभेचे उपसभापती आनंद मामनी यांचे शनिवारी मध्यरात्री बेंगळूर येथील मणिपाल रुग्णालयात उपचारा दरम्यान निधन झाले. आजारपणामुळे काही दिवसांपूर्वी त्यांना रुग्णालयात दाखल करण्यात आले होते. 

निधनाचे वृत्त समजताच मुख्यमंत्री बसवराज बोम्माई  यांच्यासह अनेक मान्यवरांनी भेट देऊन पार्थिवाचे अंत्यदर्शन घेतले. त्यानंतर आनंद मामनी यांचे  पार्थिव बेंगळूर येथून थेट सौंदत्ती येथील यांच्या निवासस्थानी आणण्यात आले. तेव्हा कुटुंबीय आणि चाहत्यांना अश्रू अनावर झाले होते. यावेळी संपूर्ण सौंदत्ती मतदार संघ शोक सागरात बुडाला होता. 

आनंद मामनी यांच्या पार्थिवाचे त्यांच्या निवासस्थानी पूजन केल्यानंतर पार्थिव सौंदत्ती तालुका स्टेडियममध्ये अंतिम दर्शनासाठी ठेवण्यात आले. बेंगळूरहुन दाखल झालेले मुख्यमंत्री बसवराज बोम्माई यांनी अंतिम दर्शन घेतल्यानंतर सरकारच्या वतीने त्यांना श्रद्धांजली वाहिली. तत्पूर्वी, मामनी यांच्या मातोश्री गंगाम्मा आणि कुटुंबियांचे मान्यवरांनी सांत्वन केले. 

यावेळी विधानसभा अध्यक्ष विश्वेश्वर हेगडे-कागेरी, जिल्हा पालक मंत्री गोविंद कारजोळ, बृहत व मध्यम उद्योग मंत्री मुरुगेश निराणी, सार्वजनिक बांधकाम मंत्री सी. सी. पाटील आदींनी पार्थिवाला पुष्पहार अर्पण करून आदरांजली वाहिली. केंद्रीय मंत्री प्रल्हाद जोशी, माजी मुख्यमंत्री जगदीश शेट्टर, खासदार मंगल अंगडी, राज्यसभा सदस्य इरण्णा कडाडी, आमदार महेश कुमठळ्ळी, आमदार महांतेश दौडगौडर, महादेवप्पा यादवाड, दुर्योधन ऐहोळे, महांतेश कौजलगी, सिद्धू सवदी, धारवाडचे आमदार अरविंद बेल्लद, निंबण्णावर, विधानपरिषद सदस्य बसवराज होरट्टी, प्रकाश हुक्केरी, लक्ष्मण सवदी, काडा अध्यक्ष डॉ. विश्वनाथ पाटील यांच्यासह अनेक लोकप्रतिनिधी, विविध धर्मगुरू व मान्यवरांनी अंतिम दर्शन घेतले. 

उत्तर विभाग आयजीपी सतीश कुमार, जिल्हाधिकारी नितेश पाटील, जिल्हा पंचायत मुख्य कार्यकारी अधिकारी दर्शन, जिल्हा पोलीस अधीक्षक डॉ. संजीव पाटील आदी अधिकाऱ्यांनी त्यांना अखेरचा निरोप दिला. 

यावेळी हवेत बंदुकीने तीन फैरी झाडून आणि हुतात्मा ऑनर गार्डने राष्ट्रगीत गाऊन शासकीय मानवंदना देण्यात आली. दोन मिनिटे मौन पाळण्यात आले. श्रीमती रत्ना आनंद मामनी यांना मुख्यमंत्री बोम्माई  यांच्या  हस्ते राष्ट्रध्वज देऊन  गौरव करण्यात आला. यावेळी आनंद मामनी यांची मुलेही उपस्थित होती.

यावेळी शोक व्यक्त करताना मुख्यमंत्री बसवराज बोम्मई म्हणाले, विकासाची दृष्टी आणि शेतकऱ्यांची काळजी असलेला तरुण नेता गमावल्याबद्दल दुःख झाले. मामनी यांच्या निधनाने धक्का बसला आहे. आम्ही त्याला अगदी लहान वयात गमावले. कार्यक्षम व्यक्ती असल्याने मामनी नेहमीच आपल्या मतदारसंघातील विकासकामांबाबत सतत चर्चा करत असत. दीड महिन्यापूर्वीच ते निरोगी होते. ते एक युवा आणि शेतकऱ्यांची काळजी करणारे लोकप्रिय नेते होते. विशेषत: सिंचन सुविधांच्या विस्तारासाठी त्यांनी अत्यंत निष्ठेने काम केले. कौटुंबिक सौहार्द जपणारे मामनी यांचे वडील हे आपले मार्गदर्शक असल्याची आठवण मुख्यमंत्र्यांनी करून दिली.